Авторизация

Унсоколо мухъалда кьалул кор боркьун буго


Унсоколо мухъалда кьалул кор боркьун буго


Рагъал ккана Генуб, ХарачIи, Майданское росабалъ


Цебесеб номералда «Миллаталъ» хъван букIана аскарияз Генуб хасаб операция тIобитIилеб бугилан. Газеталъул иргадулаб номер жанибе кьелалде щварал баяназда рекъон, НАКалъ лъазабуна Генув лъабго изну гьечIого яргъид гIуцIарав чIванилан: ГIабдуллагь Загъулиев, Шамил ГIабдулхIамидов ва Ильяс Камилов. Хасал хъулухъалъул хIалтIухъабазул щугояв чIванин, чангояв лъукъанин, гьезул БТР ва «УРАЛ» транспорт бухIанин бицунеб буго гендерица. Кьвагьа-гIанхъи букIана Майданское ва ХарайчIи росабазда гIагарлъухъ ругел постаздаги.


Гендерил кIиго къокъа


Гендерил жамагIатчагIаз гьадин бицунеб буго хьиндаллъиялда цIияб кьал багъарараб куцалъул хIакъалъулъ: «11 апрелалда радалалдасаго рагъулаб техника бакIаризе байбихьана росдал рагIаллъуда бугеб авалалде. Къад сагIат лъабго тIубаралдаса хадуб гьенисан кIудияб кьвагьи бахъана. 19 марталда МахIачхъалаялда аскIов Семендералда чIванилан рагIизавурав Ибрагьим ХIажидадаевасул къокъа сверун ккун буго доба низам цIунулез. Цинги МухIамад Сулеймановасул («Дагъистан вилаяталъул къади») рохьилаз росулъан речIчIун буго аскариязда».


Майданское ва ХарачIи постал


Гьебго къоялъул къаси Майданское росдада аскIоб бугеб посталдеги тIадекIанцIи гьабуна изну гьечIого яргъид гIуцIараз. Гьеб кьвагьа-гIанхъиялъул хIасилалда чIварав чи ккечIо, Майданское росдал цо чIобогояб минаялда гулби щун руго. ХарачIи посталдаги кьвагьи лъуна гьеб сордо-къоялда жаниб. Гендерил гIолохъабаз абулеб буго жидер росулъ букIараб рагъулъ чанго аскарияв чIванилан ва лъукъанилан. НАКалъ абуни лъазабуна жидер цо рагъухъан лъукъанилан.


Чадрал гIолел гьечIо


Аскарияздаги рохьилаздаги гьоркьоб кьалул кор боркьидал, ракълилал гIадамаз Генуб росу тана. Гьезул цо-цоял МахIачхъалаялде, Буйнакскиялде ва цоги шагьараздегун росабалъе гIага-божаразухъе ана. Щуазарго чи вугеб Генуб росдал аслияб халкъ Рихьуни ГЭС балаго гIун бачIараб Заманалъулаб поселокалда буго.


Лъабнусго чи жанив вукIине бегьулеб лъабкъого чадир бачIанин хIукуматалъ гьенибеян бицана гендерил бегавул АлясагМухIамадовас. Амма квачараб гьаб заманалда гьел чадразухъе лъугьунев чи гIемер кколев гьечIо, киназего гьел гIолелги гьечIо. «БацIцIадаб ракI» абураб рахIмуяб идараялъ «КаМАЗ» машинаялъ ханжуги цоги нигIматалги щвезаруна гьеб поселокалде. БичIчIулеб жо буго гьеб кумекалъги гIей гьабунгутIи. Цо рокъор анцI-анцI чиги вугин гьенир хIебтIунилан абуна бакIалъул гIадамаз.


ТIахьазда данде рагъ


Росулъ чIухь балелъул, гIадлу-низам хвезабиялъул хIужабиги руго аскариязул рахъалдасан. Масала, МухIамаднаби ПатахIовас гьадин бицана: «Цеве росдал дибирлъун вукIарав ГъазимухIаммад Абакаровасул рокъореги лъугьун, кинабго къайи-матIах щущазабун буго рагъулаз. ЦIакъго инжит гьабун бугоан гIалимчиясул библиотека. Цо-кIиго граната гьенибги лъун, ун руго аскариял нахъе. Рохьилаздехун щибго бухьен бугев чи гьечIо ГъазимухIаммад».


Аскарияз рукъзабахъа компьютерал ва цоги къайи-цIа бикъулеб бугилан гIарзал руго гендерил. Жидер боцIи-панз низам цIунулез хъвеялъул хIужабиги загьирлъанилан абулеб буго гIадамаз.


НекIсияб мажгит


ТIоцебесеб къоялъ рагъулаз росдал аслияб мажгиталдаги речIчIулеб букIанилан бицана гендерица. Кавказалъул имамзабаз жаниб какги бараб, кIинусидаса цIикIкIун сон бугеб, некIсияб мажгит ккола гьеб. Араб анкьалда росу чIобоголъидал, мажгиталдасан какги ахIун гьечIо. ГIадамазе росулъе рачIине изну кьолеб букIинчIо аскарияз.

17 апрелалда НАКалъ баян кьуна гьеб мажгиталъул чIабаралъулъ яргъил нахърател батанилан. Бегавулас абулеб буго гьеб ярагъ-матахI гьениб ункъо-щуго соналъ цебего лъураб гIадаб сурат бугоанилан.


Ахир бихьулеб гьечIо…


Унсоколо районалъул нухмалъулев Шамил МухIамадов ва гендерил бегавул АлясагI МухIамадов дандчIвана Дагъистаналъул бетIер Рамазан ГIабдулатIиповгун. Президентас гьезда абун буго, хасал тадбирал лъугIизегIан ва гьелдаса хадубги росдал гIадамазе кверчIвай-кумек гьабизе бугилан, социалиябгун экономикияб рахъалъ гьеб районалъул хьиндаллъи цебетIезабиялъеги квербакъилилан.

Жеги кигIан заманаялъ Генуб хасаб операция халат бахъинебали баян кьолеб гьечIо аскарияз. «Миллаталъ» халккун буго гьеб кIудияб тарихалъул ракьалда лъугьа-бахъунелда хадуб.


2013 сон


Автор: ГIизудинил ХIамзат

Баяналъул кьучI: Казият "Миллат". МахIачхъала

оценка новости: 
  • Не нравится
  • +77
  • Нравится
Оставить комментарий
Унго ч1амизабураб г1акъуба щиб,гьеб росдада т1ад! worried 


  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook 
  •  Twitter 
  • OK

Мы в Twitter.Com


Мы в Ok.Ru

Курс валют предоставлен сайтом kursvalut.com