Авторизация

Экстремалал. Зобалазда къвалги балаго

Журналистазул хIалтIул хаслъи буго гIемерал интересал,гIажаибаб хъулухъ-пишаялъул, шавкъазул гIадамалгун дандчIвай. Гьединавлъун вихьана дида гьал гIагарал къоязда «Фейсбук»социалияб гьиналда диргун гара-чIвари ккарав Шамил мухъалъул Сомодаса Абумуслим МухIамадовги. Республикаялда ругел 7-8 парапланалда роржунезда гьоркьов магIарухъ цого цо вугев чик кола гьев лебалав магIарулавги. Нухазул бутIаялда хIалтIулев Абумуслимица Саратовалда цIалун лъугIизабун буго росдал магIишаталъул академия. Амма щвараб махщалида рекъон гьев хIалтIун гьечIо.Хъурщизе вижарасда кинго воржине кIоларин гIакълуялда данде чIун, гIолохъанчиясул эркенаб заманалъ машгъулаб ишалъ бихьизабулеб буго, рокьи бугони, Аллагьасул кумекалдалъун зобалазда «къвал базеги»кIолеблъи.


-Абумуслим, кида ва кин байбихьараб дуца гьеб къанагIатаб, ва гьелдаго цадахъ хIинкъи цIикIкIараб ишалде?


Нусго чиясда гьоркьоса кIигоясулгIаги букIуна хIинчI гIадин воржине къунареб анищ.ГьитIинаб къоялдаса нахъе дирги букIана гьеб. Макьилъцин бихьулаан кидаго дунго воржунев, гIурччинхарилъ вегарав чи, зодихъ валагьун сагьвиллъун, кьижунги кколаан. Заман аниги, дир анищ ссунеб букIинчIо. Интернеталдасан балагьана парапланалда роржунезул школа, ана Пятигорскалде ва цIалана гьенив. Чанго нухалъ вортана, века-виххана, амма ракI буссинчIо. Рокъове щваравго добго интернеталдасан хъван бачIинабуна параплан ва гьале лъабго соналъ дун, цIи-цIиял борхалъаби ралагьун, ракьалда тIад воржуневго воржунев хутIун вуго (велъулаго).


-Кинабха букIараб тIоцебесеб роржен? Кин къабул гьабураб дур бокьулеб иш рокъосез?


Валлагь,тIолалго хъизам-гIагарлъиялъул чагIи данде чIарал къуркьизаризего кIвечIо жакъа къоялделъагIанги. ТIоцебесеб роржен…Къокъаб лахIзат букIаниги, ракIалдаса унареб лазат!Пятигорскалда воржана дун тIоцеве. ГьабсагIат гIадин ракIалда буго хIатIазда гъоркьа босун унеб ракь,рациялдасан инструкторасул малъа-хъваял, цодагьабго хIинкъи ва рекIелъ букIараб, бицун бажарунареб эркенлъиялъул ва аваданлъиялъул асар. Инсан воржине вижарав гьечIелъул,тIолабго чорхол клеткаби къеркьелел  рукIуна гьеб лъалареб асаралде данде чIун,амма цIияб лъазе бугеб къасдалъ кидаго тIалъи босула. Роржунаго рихха-хочизе бегьуларо,гьеб гъалатIалъе парапланеристазул саперазегIанги ихтияр гьечIо. Бищунго тIадегIанал, къадруял асарал рухьарал руго ракьалдаса ратIалъун, гьаваялде рахъиналда.


-Абумуслим, хIикмат гурищ, кин тIеренал куназ данде гьабураб чIартил кесекалда ракIчIун, гьаваялде рахъине нужеда кIолеб. Кинаб борхалъи мукIур гьаби дур мурад?


Борхалъиялда бараб жого букIунаро нижер. Парашютгун кIанцIулев воржуна борхалъудасан гIодоблъиялде, парапланерист абуни-битIараб гIодоблъиялдасан-борхалъуде, гьаваялъул чвахиялъул направление ккун, рекIее бокьаралъуве. Щибниги цIияб жо нижер рорженазулъ букIунаро, ралагье цIудул, бокьараб хIанчIил рорженалъухъ. КIудияб битIккей  буго нижее ракьалда рукIунел кидаго жаниб гьури барал бакIазда(гIалимзабаз гьелда «динамические восходящие потоки»ян абула)роржине щвей. СагIтаз гьаваялда парпадизе, хIатта, гьаваялъул чваххи кквезе кIвани, доре накIкIулъецин сапар бухьине кIола гьединал бакIазда. Риидалил заманалъ ракьулъан бачIунеб хинлъидул чвахиялъги гьабула кумек тIадросун чIезе. ГIемериселъ кибехун гьаваялъул буссин бугебали лъазе нижее кумек букIуна  зодор цокIалго тIавап гьабулел цIумазда хадуб хал ккведал. Аэродинамикаялъул хиси гьечIеб низам ккола- байбихьи ва рещтIен дурусго гьорода данде гьаби. Хурдузухъ, лъималъухъ, кIкIуй-цIаялъухъ балагьун лъазе кIола гьебги. Кинабго «кIицIул кIигогIан»бигьаяб гIелму.


-Дуда кколарищ, ракьалдасан хьвадизе бижараб рухIчIаголъи зодобе бахъин Аллагьасулъ дагIба бараб гIадаб дандечIей бугилан?


Диргун лъай-хъваялда, гьудуллъиялда ругел парапланеристал киналго руго гIажаибал, чилъи, яхI-намус чорхолъ бессарал, тIотIоецин жидедасан зарал гьечIел гIадамал.Дунгоги вуго Дагъистаналде исламияб дин босун вачIарав Абумуслим шайихасул цIарги лъурав, ТIадегIанав Аллагьасе мутIигIав, Гьесукьа хIинкъарав чи.Щибаб нухалъ ракьалдаса ватIалъулаго, дица Аллагьасе тасбихI гьабула, гьесул цIобалъухъе кьола дирго гIумруги. Гьаваялда гьороца дунго теркIезавидал, иман жеги щулалъула, цо батIаяб,цIумаздаги малаикзабаздаги гьоркьов пархолев вугев гIадаб асар лъугьуна дирго напсалъеги.


-Васас босулеб гьечIищ ирсалъе дуе хирияб гьеб пиша?


Дица гIиссинккун гьесдаги малъулеб буго парапланазда роржиялъул иш. Вачуна цадахъ Шималияб Кавказалда дунго гIахьаллъулелщинал рорженазде, рихьизарула аэродинамикаялъул гIумруялда мисалал.


Щибаб рорженазулъ гьеб гIажаибаб, бахилаб гIищкъу кодосесе тамахаб рещтIенги гьарун, дица Абумуслимилгун къо-мех лъикI гьабуна.Гьесин абуни, жиндирго иргаялда, рагIи кьуна  дуниял хинлъарабго Хунзахъеги вачIун, ЦIолбокь кIкIалалда тIасан воржун, ханзабазул ракьалда тIад зобалдаги «къвал базе». Гьадинал гIажаибалги руго нилъер миллаталда гъорлъ гIадамал.



Автор: Фатима МухIамадова

Баяналъул кьучI: Казият "Миллат". МахIачхъала

оценка новости: 
  • Не нравится
  • +2
  • Нравится
Оставить комментарий


  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook