Авторизация

Хьиндалазе пачалихъалъул налъи – 8, 5 миллиард гъурущ


ЖамагIаталъул газа…


Хьиндалазе пачалихъалъул налъи – 8, 5 миллиард гъурущ


Гьедин лъазабуна Авартеатралда цебе тIобитIараб митингалда 


2011 соналъул 22 октябралда Мах1ачхъалаялда Авартеатралда цебе бугеб майданалда митинг тIобитIана Рихьуни ток гьабулеб лъел станциялда гъоркье ракьал арал гIадамаз.  Гьеб станция баялдалъун жидее ккараб ва жеги пачалихъалъ бецIичIеб зарал  микьго миллиардгун щунусго миллион гъурущалда бащалъулилан бицана митингалъул гIахьалчагIаз.


Рихьундерил станциялъул хIорикье ва сангаралъукье ракьал ана  Унсоколо ва Хьаргаби мухъазул гIадамазул. Гьедин пачалихъалъ гьабураб зиян жидее бецIичIел магIарулазул чанго росдал вакилзаби рачIун рукIана МахIачхъалаялде митингалде. Гьеб тадбир гIуцIана ва бачана Унсоколо росулъа жамгIияй хIаркатчIужу НахIи ГIамирхановалъ.


«Гьале 30-ялдаса цIикIкIун сон сверана Унсоколо мухъалда Рихьундерил станция базе байбихьаралдаса. Гьелда гъоркье ана 1800-ялдаса цIикIкIун гектар ракьул, - абун бицана ГIамирхановалъ. -  ХинлъимитIа, КушматIа бакIал,  Унсоколо мухъалъул Рихьуни, Майданское, Зирани, ГьаракIуни росабазул ва Хьаргаби мухъалъул Къудукь росдал ракьал ва ахал тIерхьана станциялъул хIорикь. Лъадакье арал минабазухъ гIарац кьечIо 1100 гражданинасе. Гьездаса 630 чиясе гIарац кьезе тIадаблъун бихьизабурал диваназул хIукмабиги руго… Цебеккунго лъазабичIого, гъанкъизаруна ахал, минаби. Санитарияб рагIаллъи бацIцIад гьабичIо, лъадакье кколел хабзалаби рахчичIо. ХIорил тIину гъутIбуздаса бацIцIад гьабичIо. Гьеб киналъго квербакъула республикаялда рахунел унтаби тIиритIиялъе».


Абизе ккола Сулахъалъул лъадаца хьихьун бугин Дагъистанилан. XX гIасруялъул лъеберабилел соназда хIал гьабун гIадамазда бухъизабураб Октябралъул инкъилабалъул каналалъусан  Авар ва ГIанди гIоразул лъим бачун буго Дагъистанлъул тахшагьар МахIачхъалаялде, Гъизилюрт шагьаралде. Гьеб лъеца лъалъала гIатIиркьалда гIезабулеб гIемерисеб нигIмат. Рихьундерил лъел станция балез гьенир санитариял тIалабал тIуразаричIолъиялъ республикаялда рахунел унтаби тIиритIиялъе хIинкъи бугилан кагъат хъван буго Роспотребнадзоралъ. Гьедин букIаниги, ахIвал-хIал лъикIлъизабиялъе хъулухъчагIаз щибго гьабулеб гьечIилан бицана митингалда.


Унсоколо мухъалъул ва республикалъул тIадчагIаздаса разигьечIолъиги загьир гьабуна митингалда ГIамирхановалъ.


Хьаргаби мухъалъул Къудукь росдал депутатлъун вукIарав жамгIияв хIаракатчи ХIамзат МухIамадоваас абуна станциялъул ралъдакье арал жиндир ва росуцоязул  ахазухъги ракьазухъги цIакъго мукъсанаб гурони гIарац щвечIилан. Цо соналъул бачIин бичун нусазарго гъурущ щолеб мехги букIунила. Гьединаб хайир кьолел ахазул цо сотыхалъухъ анцIазарго гъурущги кьун танин пачалихъалъ  жалилан.

Митингалъул гIахьалчагIаз иргадулал хитIабал хъвана Дагъистанлъул  президентасул ва цоги нухмалъулезул цIаразда.


2011 сон


Автор: ГIизудинил ХIамзат

оценка новости: 
  • Не нравится
  • +81
  • Нравится
Оставить комментарий
Гэс балелдего суал лъезе ккола жидейго,щиб элъ кьелеб?


  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook 
  •  Twitter 
  • OK

Мы в Twitter.Com


Мы в Ok.Ru

Курс валют предоставлен сайтом kursvalut.com