Авторизация

Нугъаязул рекъелги Гъарабагъалъул рагъги


ХIасилал. ЦIех-рех


Нугъаязул рекъелги Гъарабагъалъул рагъги


Гъуниб – Терекли-мектеб – МахIачхъала  – Степанакерт – ЦIор – Эшкаконалъул ГЭС ва хIор


Араб анкьалда, 15-16 июлалда, Гъуниб магIарда авар мацIалъул мугIалимзабазул данделъи тIобитIана. Нилъер халкъалъе кIвар бугеб, миллаталъул мацIги цIарги цIунулеб, ракIалдаса унареб лъугьа-бахъин букIана гьеб. Гьелъул хIакъалъулъ макъалаби цIализе бегьула «Миллаталъул» жакъасеб номералда. Гьединго араб анкьалда Дагъистаналдаса ратIалъилилан цереккун съездал тIоритIулел рукIарал нугъаязул районалъе цIияв бетIер щвана -  базарган ва сахаватчи Мухтарбий Аджеков.


 Ярлыкапов – Насиров – Аджеков


 Гьелда цебе, 2017 соналъул 4 июлалда, Нугъай мухъалъул Депутатазул собраниялъ БаймухIамад Ярлыкапов районалъул бетIерасул ишал тIуразарулевлъун теялъул хIукму хвезабун букIана. Районалъул депутатал Дагъистаналъул тIалъиялъе мутIигIлъунгутIи букIана гьеб, Ярлыкапов кколаан МахIачхъалаялъ вихьизавурав чи. 6 июлалда полициялъул кумекалдалъун Ярлыкапов бетIерасул тахида кIусана. Нугъаязул съезд ахIаразе бокьун букIана районалъул бетIерлъун Депутатазул собраниялъул нухмалъулев Руслан Насиров тезе.

18 июлалда, киналго рахъазе данде кколев чи хIисабалда, маслихIат гьабун, Дагъистаналъул нухмалъиялъеги Нугъай мухъалъул гIадамазеги рекъолев, хIурмат бугев хIаракатчи вукIиналъ, Мухтарбий Аджеков тун вуго гьеб мухъалъул бетIерасул ишал тIуразарулевлъун.


Жидеда питнаби чIалгIун ругин, ракълилаб, парахатаб гIумруялда рукIине бокьун бугин абулеб буго нугъаязул хIаракатчагIаз. Россиялдаго рагIараб ахIи-хIур гьеб мухъалда багъаризабуна, Дагъистан тун къватIирехун ва жанир ругел цо-цо власть бокьарал  къуватаз.


ХIеж-миссиялъ – 15 сон


14 июлалда кIодо гьабуна Россиялъул ХIеж-миссиялъ 15 сон тIубай. Гьеб тадбиралда гIахьаллъана Дагъистаналъул бетIер Рамазан ГIабдулатIипов,  СагIудиязул ГIарабиялъул Ханлъиялъул вакил ГIабдурахIман бен Ибрагьим ар-Расси, Дагъистаналъул муфти, шайих АхIмад-хIажи ГIабдулаев ва цогидалги. Россиялдаса хIажизабазе исламалъул щуабилеб рукну тIубазе хIалтIи гьабизе байбихьаразда гъорлъ вукIанин живилан бицана гьениб Рамазан ГIабдулатIиповас. Россиялъул ХIеж-миссиялъул нухмалъулев МухIамад ХIамзаевасе шапакъатги кьуна Дагъистаналъул бетIерас. «Миллат» басмаялъул редколлегиялъ цоги нухалъ баркулеб буго машгьурав хъвадарухъан МухIамад ХIамзаевасда гьеб шапакъат, «Дагъистаналъул халкъияв шагIир» абураб цIар. Аллагьас киназулго хIеж ва цогидал лъикIал гIамалал къабул гьареги.


Гъарабагъ цIадулъ


Кавказалда бакI-бакIазда пирхулел ва сунел тунка-гIусиял, питнаби камичIо араб анкьалдаги. Гъарабагъалда цIидасанги рагъул пири пирхулеб буго. Азербайжаназ ва эрменияз цоцазде гIайибал ралел руго, МугIрузулаб Гъарабагъалъул фронталда гIорхъабазул низам хвезабунилан ва кьвагьданилан. Масала, 20 июлалда Азербайжаналъул цIуниялъул министерствоялъ ва къуваталъул идарабаз лъазабуна цебесеб сордо-къоялда жаниб эрменияз 126 нухалъ гIорхъиялъул низам биххизабунилан ва кьвагьи гьабунилан. 18-19 июлалда эрменияз 149 нухалда кьвагьи лъунилан лъазаби букIана Азербайжаналъул рахъалъул. 15 июлалда МугIрузулаб Гъарабагъалъул цIуниялъул министерствоялъ баян кьуна анкьида жаниб жидеде 500 нухалъ кьвагьданин Азербайжаналъул рахъалдасанилан.


Гьеб питна-кьалалда гьоркьоб 19 июлалда МугIрузулаб ГъарабагъАлъул Миллияб Собраниялъул депутатаз  улкаялъул бетIер вищана – цебесеб болжалалдаги гьеб хъулухъалда вукIарав Бако Саакян. МугIрузулаб Гъарабагъ пачалихъ хIисабалда Бакуялъ рикIкIин тIалаб гьабулеб буго гьес. Амма Азербайжан гьелда рази гьечIо. Рехсараб рагъ-кьалалъ ЦIоралъул магIарулазул, гьединго лезгиязул ва цахуразул гIолохъабиги чIаралел руго – Азербайжаналъ тIоцебесеб иргаялда фронталде ритIула гьел.


Регионазда гьоркьоб къеркьей


 Гъарачаязул халкъалъул конгрессалъ исана 18 июлалда Россиялъул тIалъиялде хитIаб хъвана, Эшкаконалъул ГЭС ва водохранилище Ставрополалъул краялъухъе кьогеян абун. Гьеб хIор буго Гъарачаязулгун Черкесазул Республикаялда. Дагъистаналъул ГЭСалги гьезул хIоралги Пятигорскалъ пайда босулел руго. Гьездасан щвараб хайир Дагъистаналда хутIулеб хIал гьабеян хъвараб хитIабги бихьуларо, гьеб рахъалъ бахъулеб хIаракатги гьечIо.


Канлъиги кантIиги камун хутIугеги нилъ! Сахал чагIи сах таги!


Автор: ГIизудинил ХIамзат

Баяналъул кьучI: Казият "Миллат". МахIачхъала

оценка новости: 
  • Не нравится
  • +49
  • Нравится
Оставить комментарий
Лъик1аб обзор буго!
Берда рихьулелги пардавалда нахъа рахчаралги лъугьа-бахъинал, гIиллаби, хIужаби, ишал – «Миллаталъул» гьурмазда!


ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook 
  •  Twitter 
  • OK

Мы в Twitter.Com


Мы в Ok.Ru

Курс валют предоставлен сайтом kursvalut.com