Авторизация

Рамазан ГIабдулатIипов вуго бихьинаб хIара

Тарихиял дарсал


Рамазан ГIабдулатIипов вуго бихьинаб хIара


ЧIвадарухъабаздаса Дагъистан бацIцIад гьабуна гьес


2014-2017 соназда Дагъистаналъе бетIерлъи гьабурав Рамазан ГIабдулатIиповасул хIаракат Дагъистаналъеги тIолго Россиялъеги цIакъ пайдаяб букIана. Гьесул жигарги, бажариги, гIакълу-лъайги халкъалъе, улкаялъе гIоло хIалтIана, сордо-къоялъ чIечIого. Амма гьесул гIатIидаб, кIудияб хIалтIи щвалде щун бихьизабичIо гьесул пресс-хъулухъалъги цадахъ хIалтIулезги. Заман анагIан, цIикIкIун къимат гьабила дагъистанияз ва Россиялъул киналго гражданаз Рамазан ГIабдулатIиповасул. Гьесул политикаялъул аслиял бергьенлъаби ккола Дагъистаналда рекъел, хIинкъигьечIолъи букIинабизе бажари, чIвадарухъабазул кверщалидаса республика эркен гьаби. Бокьарав велъила, бокьарав гIодила, амма хIакъикъат гьединаб буго.


АнцI-анцI школал, лъималазул ахал, нухал…


КъасабчагIаз боцIи гIадин, хъолеб, ччукIулеб букIана Дагъистаналъул халкъ. ТIад магъало лъун, хъачагъаз лагълъукье ккезарун рукIана пачалихъиял хъулухъчагIиги, базаргабиги, гIадатиял гIадамалги. Пачалихъалъул, тIалъиялъул суратго биххун, лъугIун бахъун букIана. Гьеб кинабго гIадлу гьечIолъиялда ва чороклъиялда кьаби щвезабуна ГIабдулатIиповас. Гьес Дагъистаналъе бетIерлъи гьабурал соназда гIадамазда кIвана бигьаго хIухьел цIазе, магIишат цебетIезабизе, гIумру цебе бачине.


Рамазан ГIабдулатIиповасул заманалда кIохIалго гIодов чIун пачалихъалъул хIалтIухъан течIо. Гьесдаса тIалаб гьабуна яги хIалтIейин, яги хъулухъалдаса нахъе айилан.


РакIалде щвезарилин ГIабдулатIиповасул заманалда Дагъистаналда гьарурал цо-цо кIвар бугел хIалтIаби. Республикаялъул тахшагьар МахIачхъалаялъе Тарнаиралъул лъим чIезабуна, анцI-анцI школал, лъималазул ахал, больницаби рагьана, хъил тIураб нухлул нус-нус километрал рахъана, миллияб маданият ва мацIал цIуниялъе, церетIеялъе кIудияб хIаракат бахъана, Россиялъул халкъазул маданияталъул кIалгIаби эхетана, гьалбадерил рукъзал, сиял, хъулби цIигьаруна, музеял рана, ва гь.ц., ва гь.ц.


Рамазан ГIабдулатIипов Дагъистаналде вачIинелде, рагьулеб цIияб объект, пачалихъияб ва социалияб бакI къанагIатаб лъугьа-бахъин кколаан. Санкцияз кIвекIулеб улкаялъул бюджет букIаниги, гьесда бажарана гIемерал цIиял бакIал рагьиялъе хIалтIи гIуцIизе.

ЧIамучIал, гIадамал сванхиялда кьижарулел, хъунхъудиялда макьилъе кколел хIалтIулал данделъаби рукIунароан Рамазан ГIабдулатIиповасул. Гьес хъулухъчагIи халкъалъе гIоло хIалтIизе тIамуна.


Шариковазда ГIабдулатIипов вичIчIизе рес букIинчIо


Гьев нилъеда вихьана щибаб ишалда гьоркьов – хурив пурцида, кутаналда нахъаги, спортзалалда торгIо хIалевги, маданиял тадбиразда магIарул тIармида бакънал рачуневги. Дол Булгаковас хъварал гьабзазул гьарурал Шариковазда гьев вичIчIичIо, вичIчIизе ресги букIинчIо, вичIчIизе хIажатги букIинчIо. ГIурусазул кици буго, къуларав чи хобалъ гурони витIизавуларилан. Цо-цо жагьилаб, гвангвараялъуб хъанхъра чIвараб къавмалда эхере инчIо Рамазан ГIабдулатIиповасул пикрабиги, ургъелалги, мурадалги, масъалабиги, махсарабиги. Гьадинаб бутIа халкъалда гъорлъ букIаниги, жал ругин ханзабиян чIарал районазулгун шагьаразул бутIрул гьесда ратаниги, ГIабдулатIиповасда кIвана гьеб хьуцI бакъвазабизе, гьениб ах чIезе, халкъ макьидаса борчIизабизе, гIалам ракълилаб ва хIалтIулаб низамалде бачине. ТIубарал къватIал кьвагьизарулеб, щибаб къоялъ низам цIунулел идарабазул хIалтIухъаби чIвалеб, рагъулаб ахIвал-хIалалда щвана гьесухъе Дагъистан. ГIорхъолъа борчIараб ахIвал-хIал лъазабун букIинчIониги, хIакъикъаталда гьединаб букIана сипат-сурат.


Бидул нухде нуцIа къана гьес


ЧIвадарухъабазул, хъамалчагIазул, гIащтIичагIазул, зулмучагIазул, талавурчагIазул кверзукь букIана Дагъистан. Пачалихъиял гIуцIабазда лъилниги гIумру ва хIинкъигьечIолъи цIунизе кIолеб букIинчIо. Гьединаб хIал биччан тун букIана цебесеб власталъ. ГIабдулатIиповас гьеб гIала-гъважаялъе ахир лъунин абизе бегьула. Низам цIунулел идарабазулги буго гьеб ишалъулъ кIудияб хIаракат. Амма аслияб жо ккола власталъ гьел чIвадарухъаби, киллерал гIезари лъугIи, гьеб къагIидаялде нуцIа къай.


Рамазан ГIабдулатIиповасул хIакъалъулъ жеги гIемер хъвазе буго. Гьаб макъалаги ккола гIедегIалихъе «Миллаталъул» номералъе херхарал мухъал. ГIодоре риччан, пикру гьабун, ургъун, хIисаб гьабизе гIемерал ишалги, проекталги, суалалги нахъе тана гьес.

Абизе кIола:  - Рамазан ГIабдулатIиповасул цIар буго магIарулазул, Дагъистаналъул бищун лъикIал нухмалъулезда гьоркьоб: КIудияв ГIумаханасул, Шамил имамасул, ГIабдурахIман Данияловасул цIаразда гъорлъ. Аллагьас сахлъи кьеги гьев саламатав инсанасе. Амин.


Автор: ГIизудинил ХIамзат

Баяналъул кьучI: Казият "Миллат". МахIачхъала

оценка новости: 
  • Не нравится
  • +62
  • Нравится
Оставить комментарий
Амин,баркала бугеб хъаваралъухъ!
Заманаялъ кьела бищун битIараб къимат.
  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook 
  •  Twitter 
  • OK

Мы в Twitter.Com


Мы в Ok.Ru

Курс валют предоставлен сайтом kursvalut.com