Авторизация

Халгьабун вуго дун Дагъистаналъухъ, дирищ гьаб, чиярищ лъазе кIоларо


  ЖамагIаталъул газа

 Халгьабун вуго дун Дагъистаналъухъ,

 Дирищ гьаб, чиярищ лъазе кIоларо


 Расул ХIамзатовги жакъасеб къоги


Исана Дагъистаналда кIодо гьабулеб буго ЦIадаса ХIамзатил Расулица 95 сон тIубай. Гьединго 5-10 сентябралда республикаялда 32-абилеб нухалъ тIобитIулеб буго «ХъахIал къункърабазул къоял» абураб адабияталъул фестиваль.


…Саву кьун, босараб кьавудахъ гIадин…


Жакъа Расул ХIамзатов чIаго вукIаравани, нилъер республикаялда лъугьа-бахъунеб жо гьесие рекIее гIей щакаб букIана. 1998 соналъул августалда, Дагъистаналъул рухIияв цевехъан кьвагьизавидал, гьес хъван букIана:


…Дун нилъер саназухъ валагьун вуго,

Саву кьун, босараб кьавудахъ гIадин.

Халгьабун вуго дун Дагъистаналъухъ,

Дирищ гьаб, чиярищ лъазе кIоларо.


Мун дир батанани, мажгитул кIалтIа,

Муфти шагьидлъизе щай дица тарав?

Огь, СайидмухIамад, огь, АхIмад-хIажи,

Нуж кватIараб рузман буго каранлъ къан.


Россия – Азербайжаналъул нухдасан


МагIарул халкъалъул къисматалъул, тарихалъул, аралъул, жакъаселъул ва букIинеселъул гIемер хъвана. ЦIоралда, гьанжесеб Азербайжаналда гъорлъ ругел миллатцоязул гIузрабазул бицарал макъалабузул читIир, цикл къватIибе бачIана. Гьениб лъугьун бугеб ахIвал-хIал къватIибе гьурщулаго, рехсолаан миллиябщиналда доба мал чIолеб бугилан абураб хIужа. Гьанже Россиялдаги байбихьана гьелго гъалатIал гьаризе, миллиял рахъазде гьужумал гьаризе.


МагIарулал кьолболаб халкълъун кколеб Закатала, Билкан ва КIахъ мухъазда мактабазда букIине кколеб куцалда магIарул мацI кьоларо, авар мацIалъул тIахьал гьечIо, нилъер рахьдал мацIалда газеталгун журналал рахъуларо, цониги районалъул бетIерлъуда аварав гьечIо, нухмалъиялда миллиял дагъистаниял къанагIат дандчIвала. Гьанжесеб Дагъистаналда бугеб хIалалъухъ ралагьани, ЦIоралда бугелда релълъунеб буго Москваялъ гьаниб бачунеб миллияб сиясат.


Россиялъул федералиял каналаз бицунеб буго халкъазул миллиял хаслъаби лъугIизаризе кколилан. СССРалъул заманалда миллатазул цIакъго рахъккунила, масала, Украинаялъул ССРалда украиназул мацI, маданият ва адабият церетIезарунила ва гьелъул хIасилалда гьез жалго гIурусаздаса батIияллъун рикIкIине байбихьанила ва жакъасеб ракь-кьалалде иш кканила. Гьединаб, загIипаб, кьучI гьечIеб пикругун цере рахъунел руго чанги хIаракатчагIи, миллатазул хаслъаби тIагIинаризе кколилан абун. Цо палихъанлъи гьабулев сиясатчияс абуна, гIурус тун, цоги мацIал Россиялда школазда малъизе таралъухъ, гIарац бахъизе кколиланцин. Гьединги букIаго, чанги нилъерго хиянатчагIи, манкуртал рагъарула, нилъее нилъер мацIги щайила, халкъги щайила, чIахIиял миллатаз гъанкъун, кIкIун ине тейилан. ТIасахун жидер жинс хисеян амру бачIани, жинсги хисила гьеб тайпаялъ, динги халкъги хисун чIечIого.


МаркIачIул гIужалда чвахулел гIораз

Малъулеб гIакълудахъ гIенеккула гьел


Нилъеца жиндир 95 сон тIубай кIодо гьабулев вугев ХIамзатил Расулица гьединан хьвадеян васигат течIо нилъее. Гьес ахIи бана: «Цадахъ росе, кIочонге, магIарул мацIги цIарги, цадахъ росе, кIочонге, магIарул гIадат-гIамал!», – илан.


Рорхатал мугIрузда руго гIадамал

Жидерго гIадатаб чIаголъиялда;

Жидерго чIухIигун, жидерго яхIгун,

Жидедаго хасаб къасдгун, гIакълугун.


Институтал цIалун лъугIичIониги,

ЦIвабзазул мацI лъала гьезул щивасда.

МаркIачIул гIужалда чвахулел гIораз

Малъулеб гIакълудахъ гIенеккула гьел.


Гьедин хъвана ХIамзатовас нилъер халкъалъул хIакъалъулъ. Жакъаги шагIирас «Дир Дагъистанилан» абизе букIун батиларо, нилъгун гьев вукIаравани. «Халгьабун вуго дун Дагъистаналъухъ, дирищ гьаб, чиярищ лъазе кIоларо», – жакъа дагъистанияз такрар гьарулел руго гьел рагIаби.


Автор: ГIизудинил ХIамзат

Баяналъул кьучI: Казият "Миллат". МахIачхъала

оценка новости: 
  • Не нравится
  • +33
  • Нравится
Оставить комментарий


  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook 
  •  Twitter 
  • OK

Мы в Twitter.Com


Мы в Ok.Ru

Курс валют предоставлен сайтом kursvalut.com