Авторизация

МахIачхъалаялда – забастовка, гIорхъабазда – накIкI


 ХIалил анкь


МахIачхъалаялда – забастовка, гIорхъабазда – накIкI


ЦIунтIа школа бухIана, Хважалмахьиб полициялъул хIалтIухъанас лъимер лъукъана


Араб анкьил хIасилал гьаруни, гIаммаб куцалда босани, бигьаяб букIинчIо гьеб чанго къо. Цересел анкьаздаго гIадин, жамгIияталъул аслияб кIвар буссун букIана Дагъистаналъулги Чачанлъиялъулги гIорхъабазул суалазде. Гьединго 2019 соналъул байбихьудаго загьирлъараб, МахIачхъалаялда жамгIияб транспорталда хьвадиялъул багьа борхизабиялъул иш микроавтобусазул ва автобусазул бетIергьабазулги шоферазулги разигьечIеб тадбиралде, забастовкаялде сверана. Республикаялъул гIузраби ва ругънал сахлъулел гьечIо. Додинго рухIулел школалги руго, халкъалде кьвагьдолел полициялъул хIалтIухъабиги руго – ЦIунтIа мухъалъул Гениялъ росулъ мактаб бухIана ва Лаваша мухъалъул Хважалмахьиб цIалдохъан полициялъулас лъукъана.


Болъихъ – Ведено, МелъелтIа – Ножай-Юрт…


Араб анкьалда Дагъистаналъул Болъихъ мухъалъул ва Чачанлъиялъул Ведено мухъалъул гIорхъода дандчIвана кIиябго республикаялъул вакилзаби. Дагъистаналъул рахъалдасан гьеб тадбиралда гIахьаллъана Болъихъ районалъул нухмалъулев МухIамад ПатхIулаев, Халкъияб Собраниялъул депутат Майирбег Алхасов, «Дагтехкадастр» идараялъул хIалтIухъан Хизри Хизриев ва гь.ц. Чачан Республикаялъул вакилзабазда гъорлъ рукIана гьезул парламенталъул спикер МухIамад Давудов, Ведено мухъалъул бетIер Нурди АхIиядов ва цогидалги.

Киналго гьеб дандчIваялда гIахьаллъарал хъулухъчагIаз лъазабиял гьаруна, кIиябго районалъул гьабсагIат ругел гIорхъабазда дагIба гьечIилан ва ругел куцалда гьел цIунизе кколилан.


Амма Бакълъулазул ракьалъул МелъелтIа росдал гIадамаз разигьечIолъи загьир гьабуна, жидер сагаялъул нусидаса цIикIкIун гектаралда Чачанлъиялъул вакилзабаз дагIба балеб бугилан. МелъелтIа росдал бегавул МухIамад ГIабдунасировасги чанцIулго борхана гьеб суал.

Гьединго ЦIумада мухъалъул жамгIияталъги хитIабал гьаруна, жидедаги ракIалда гьечIин умумузул ракь батIияб республикаялде кьезеян ва цереккун мадугьалихъе кьурал ракьалги тIадруссинареян. Амма Ингушетиялда гIадал митингалги тунка-гIусиялги жеги ккечIо Дагъистаналда. Халкъалъ тIалаб гьабулеб буго, киналго суалал рагьун, рицун, гьоркьор лъун, данд ран, рорхеян. Амма гьединаб къагIида жеги бихьудаги гьечIо. Гьаб гIорхъабазул гIузру исана лъагIалица аслиязул цояблъун хутIизе батила. 2019 соналъул ахиралде «мухIкан гьаризе» кколел руго гIорхъаби. Заманаялъ бихьизабила кинаб куцалда гьел мухIканлъизе ругелали.


ЖамгIияб транспорт: багьа бахинабиялда данде забастовка


Цоги кIвар цIикIкIарал темабазул бицани, Дагъистаналъул тахшагьар МахIачхъалаялда жамгIияб транспорталъухъ бугеб багьа борхизабиялда дандечIарал автобусазул ва микроавтобусазул гьокочагIазул (шоферазул) забастовка букIана. Лъалеб букIахъе, чанго соналъе цере къайи баччулеб транспорталъул вакилзабиги рукIана «Платон» абураб жоялда данде рахъун. Гьезул хIаракаталъул цо кIудияб хIасилго ккечIо – Россиялда «Платон» хIалтIизе биччана.


МахIачхъалаялда микроавтобусазда ва автобусазда рекIадухъ багьа 17 гъурщидаса 23 гъурщиде бахъулеб буго. ЦIиял транспорталъул фирмабиги цереселги къеркьолел руго Дагъистаналъул тахшагьаралда. 17 гъурщиде хьвадизе хIадурал фирмаби къакъалел руго тIадчагIаз. «Лъабабилеб парк» абураб цIияб, «варягазда» цадахъ республикаялде бачIараб, Санкт-Петербургалдаса фирмаялъ гьабулеб иш бугин багьаби рорхизариян кIалъалел ругоан забастовкаялде рахъарал чагIи.


Гьедин дандечIеялъул акциялде шагьаралъул къватIазде рахъарал жамгIияб транспорталъул хважаинзабазда кIалал гьикъизе рачIун ругоан тIадчагIазул вакилзаби. Нужеца налогал кьолел гьечIилан, бадире килщал ритIулел ругоан забастовкачагIазде. Сапаралъул тIамачалъухъ гIураб жо кьолин жидецаян данже жаваб гьабуна гьезие рази гьечIолъи бихьизабизе къватIире рахъарал гIадамаз. Гьезул цо-цо хIаракатчагIи полициялъулаз рачунги ана.


Гьаб нухалдаги халкъалъул гьаракь гьоркьоб къотIизабизехъин буго тIадчагIаз. Россиялъул магIданал ричун рахъарал олигархазул яхтаби дунялалъул океан къотIун лъедолел руго, улкаялъул гIадатияв гражданин, налогазул ва цоги тIад лъурал гьиразул бакIлъиялъ, гьод къулун, ракьалде щапизехъин вуго. Гьединаб сипат буго жакъасеб, ритIухълъи гьечIеб Россиялъул.


РухIарал школал, лъукъарал лъимал…


ЦIа ккей буго тIабигIияб балагь. Аллагьас цIунун таги балагьаздаса. Гьале 12 февралалда бачIана цоги лъикIаб гуреб хабар – ЦIунтIа мухъалъул Гениялъ росдал школалъул мина бухIана. Мокъокъ росу бухIун, гьеб тIабигIияб къварилъиялъ гьабураб зарал бецIуларогоги букIана соназ халат бахъараб ахIи-хIур.


Дагъистаналъул лъайкьеялъул ва гIелмуялъул министерствоялъул баяналда рекъон, Гениялъ росулъа лъимал цIализе аскIор ругел росабалъе хьвадизе руго.


Ахирал соназда школал рухIана Болъихъ районалъул РахатIа, ЛъаратIа мухъалъул Гъенеколоб, Хунзахъ районалъул ЛъагIилухъ ва цогидалги росабалъ. Гьел рухIарал школазул гIемерисел жеги цIигьарун гьечIо.


Лаваша мухъалъул Хважалмахьи росулъ 2019 соналъул 12 февралалда полициялъул хIалтIухъанас речIчIун буго ичIабилеб классалъул цIалдохъан МухIамадсалам ХIажиевас бачунеб машинаялда. Гьес машина чIезабичIин ва транспорталда госномерал рукIинчIилан, жидерго хIалтIухъан вацIцIулев вуго полициялъул вакилзабаз. Амма хважалмахьисез гьеб иш жаваб гьабичIого тун гьечIо. Ццин бахъараб халкъ бакIарараб бакIалде рачIарал полициялъул хIалтIухъаби рухун руго гIадамаз, гьезул цояв больницаялде ккун вуго, «гвангвараялъул ва гIадалнахалъул тункиялъ».


«Гьуррра» ахIулел руго…


Бихьулеб букIахъе, Дагъистаналда гIемерал тIурачIел суалал руго, гIадатияб халкъалъул разигьечIолъи цIикIкIунеб буго. Амма гьанже гIемерисел «блогеразда» ва цоги жамгIиял гьиназда сардал рорчIулел «экспертазда» гьел киналго гIузраби «рихьулел гьечIо». Цадахъ лъугьун, «варягазе» ва Къадировасе «гьуррра» ахIулел руго гьел. Дагъистаналъул халкъилан абуни, кидаго гIадин, жамагIаталъул газаги босун, нилъер ракьалъулги миллаталъулги ургъалида буго. Аллагьас квербакъи гьабеги нилъер халкъалъе! Амин.


Автор: ГIизудинил ХIамзат

Баяналъул кьучI: Казият "Миллат". МахIачхъала

оценка новости: 
  • Не нравится
  • +9
  • Нравится
Оставить комментарий


  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook