Авторизация

Бергьенлъиялъул, багьабазул ва тахбакIазда хиса-басиязул хIакъалъулъ

ХIалил анкь


Бергьенлъиялъул, багьабазул ва тахбакIазда хиса-басиязул хIакъалъулъ


ГьатIан къоялъул радал рикIкIадаб Америкаялда иргадулаб, ракIчIараб ва мухIканаб бергьенлъи квер жубараб рагъулъ босана нилъер ракьцояв Забит МухIамадшариповас. Гьеб бергьенлъиялъ Забит вачIана дунялалда бищунго тIадегIанаб даражаялъуллъун рикIкIунеб UFC промоушеналъул 6-абилеб бакIалде. Гьеб буго лъаледухъ чемпионасул рачелалде Забит гIагар гьавураб гали. Спорталда хадуб хал ккуразул пикруялда рекъон, Забит МухIамадшариповасул кIудиял ресал рагIула гьеб борхалъи босизе. Нилъее хутIараб жо буго гьелда хадуб хал кквей, Забитие икъбал ва бергьенлъи гьари. 


Абизе бегьула гьеб букIанин араб анкьил магIарулазе аслияб лъугьа-бахъин абун. Рагъ-кьалалда, кьаби-тункиялда букIунеб миллат букIинги хIисабалдеги босун, я экономикиял бергьенлъабаз, я бечIчIараб рахьалъ, я гIезабураб гьаналъ магIарул чиясе роххел бачIунаро, цо чияс гIодовги тIамун, цогидав вуххараб мехалда гIадин. Гьеле гьедин магIарулал рохизаруна нилъер Забитица, гIодовги тIамун, американав Джемери Стивенс абурав чиги вухун. Рухе абеха, гьеб гурищха нилъееги къваригIун букIараб?


17 гъурущ – гIемер, 23 гъурущ – дагь – тамашаяб хIисаб


Республикаялъул хIукуматалда ва политикияб гIумруялъулъ аслияб кIвар буссинабизе гIураб лъугьа-бахъинлъун рикIкIине бегьула тахшагьаралда гIадамал раччулеб транспорталда хурхун лъугьараб ахIвал-хIал. Законалда рекъон гьабуни, гьел пассажирал раччулел фирмаби риччазе ккола эркенго тендеразда гIахьаллъизе ва бищунго дагьаб багьаялда гIадамал раччулел ва хIажатал шартIал тIуразарулел риччазе ккола гIадамал раччизе. Щаялиго республикаялъул политикияб нухмалъиялъ, нилъер Дагъистаналъул фирмабазул рукIине кколел шартIал гьечIин, транспорт басрияб бугин, Санкт- Петербургалъул «Третий парк» абулеб фирма бугIулеб рагIула пассажирал раччизе.


Республикаялъул бетIер Владимир Васильевас ахирисеб данделъиялда рагьун абуна хIажат ругин лъикIаб техникаги бугел, шартIалги тIуралел, республикаялъул бюджеталъе магъалабиги кьолел фирмаби. Ай, Петербургалъул фирмаби риччазе бокьараб гIадаб жо бичIчIизабуна. Жакъа пассажирал раччулел нилъералги руго гьедулел, шартIалги тIуран ругин, жидеца щуго гъурущалъ учузги раччилин, магъалабиги кьелин, жал хIалтIудаса махIрум гьаругеян. Гьеб тIалабалъухъ гIенеккулев чи ватулев гьечIо тIад законгун гьанибе бачIараб Россиялъул. Щай бегьилареб батIаго гьеб Петербургалъул фирмаян суал бачIани, гьениб буго чанго санагIат гьечIолъи. 


ТIоцебесеб иргаялда гьаниб буго моцIие бачIунеб 1 миллиард гъурущ гIарац, нилъер республикаги тун, Петербургалде ине бугеб. КIиабилеб, 3-азарго чи гIадамал раччулеб транспорталда ругел индивидуалиял предпринимателал махIрумлъула хIалтIудаса. Лъабабилеб ва аслияб санагIат гьечIолъи, гьадингоги мискинал дагъистаниязе 17 гъурщил бакIалда 23 гъурущ маршруткаялда рекIиналъухъ кьезе ккей лъикIаб иш гуро. ЧIван къотIун жеги рагIалде бахараб жо гьечIо, бихьулеб буго республикаялъул нухмалъиялъе «Лъабабилеб паркалъухъе» кьезе бокьун букIин гьеб бизнесалъул бутIа. Гьеб буго жакъасеб хIукуматалъул гIаммаб политикаялдаса цо бутIа. Гьединабго ахIвал-хIал лъугьунеб буго бензин, цIатари ва газ бичиялъул суалалъулъ республикаялда. Гьанибе бачIине бугин «Лукойл» фирма нартил базаралдеян лъазабуна бетIерас. Гьелъги лъаледухъ зарал гьабизе буго республикаялъул бензин ва газ бичиялъул дармида ругел гIадамазе, амма, республикаялъул нухмалъиялъул рагIабазда рекъон, гьез лъикI магъалаби кьезе рагIула Дагъистаналъе.


Толстиковалъул тахбакIал ва интеллигенция хисун базаргаби


Гьел руго финансовиял ва экономикаялъул суалал. Политикияб вала-рахасалъулъ рачIана цойги харбал, мал-мулкалъул министерлъиялда йикIарай Екатерина Толстикова премьер-министрлъун ячIине рес бугин абураб. Гьеб хабар чIван къотIун я тасдикъ гьабизе, я гьереси гьабизе рес гьечIо, харбал руго гьединал. Амма гIемерисел ишалъулъ гьейгун дандчIварал дагъистаниязул гьелдехун бугеб пикруялъухъ гIенеккани, киназего гьеб хабарлъун хутIизе бокьун бугин абизе бегьула. Къабул гьайичIо гьей гIадан дагъистанияз. Цо дагъистаниял хIалареб пахрулъи халлъулеб буго киназдаго гьелъул нухмалъиялъулъ ва гIадамазулгун гьоркьорлъабазулъ.


В.Васильевас Е.Толсиковалъе, хасаб хIукмуги хъван, «Баркалаялъул кагъат» кьуна ракIбацIцIадаб хIалтIухъ. Гьелъул хIисаб щиб бугебали абизе кIоларо, рес буго мал-мулкалъул министерлъиялдаса махIрумлъиялъухъ рецIел хIисабалда гьабулеб сайигъат батизеги. Цоги батIияб магIна гьелъул бугищали абизе кIоларо.


Гьеб гуребги, цо гIажаибаб указ букIана гьаб анкьалъ В.Васильевасул. Россиялъул президентасда цеве вугев Дагъистаналъул вакил ХIамзат ХIамзатов, Расул ХIамзатовасул вац ХIажиясул вас, интеллигентги нахъе гьавун, гьесул бакIалда тана Саид Амировасул яцалъул вас Жамал ХIасанов абурав чи. КIиабилесул рахъалъ «интеллигентин» абизе захIмат буго. Ай, гIелмияб интеллигенциялъул наслуялъухъа босун, базаргабахъе кьуна Дагъистаналъул Москваялда бугеб вакиллъи. Щиб хIисаб гьениб бугебали лъаларо. Лъалев Аллагь вуго. Хабар лъикIаб рагIаги.


Автор: МухIамад БисавгIалиев

Баяналъул кьучI: Казият "Миллат". МахIачхъала

оценка новости: 
  • Не нравится
  • +3
  • Нравится
Оставить комментарий


  • ТIасан калам
  • Къоязда
  • ЦIалулеб
ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook