Маг1арулал

МАГIАРУЛАЛ

 Релъи-хъуй гьечIого рохизе лъалел,

МагIу чваххичIого гIодизе лъалел,

ГIишкъул рекIараб цIа цIунизе лъалел,

МагIарулал ругел лъикIал гIадамал.

БакIал къваридалъур ракIал гIатIидал,

Рукъ мискинлъаниги намус бечедал,

 ТIаде бачIараб къо лъимлъун къулчIулел,

МагIарулал ругел лъикIал гIадамал.

Лъимадул гIадинаб гIадатияб ракI

 Чарамлъун къвакIула, къел гьабун хадуб;

 КъваригIаралъуб рухI «майилан» кьолел,

 МагIарулал ругел лъикIал гIадамал.

РикIкIен дагьлъаниги гьунар гIемерал,

ГIурда тIегь бижизе чорхол би тIолел,

Божизе бегьила гьаб дир халкъалда,

 – МагIарулал ругел лъикIал гIадамал.

1945

Автор: Расул Х1амзатов