Авторизация

ТIаргъида хадув арас бетIер бачIарабила…

Щиб гьабунги нилъер бечелъи, миллатаздалъун букIаниги, мацIаздалъун букIаниги, махщелчагIаздалъун букIаниги цIунизе кколеб бакIалда, нилъер цо гьитIинабниги хъулухъ кодобе щварав чияс «нилъерилан» абураб щинаб жоялда тIад мал чIола.

Вай, дур бетIерчIахъаяв, мун гIурусазда берцин вихьизейин, доз кIодо гьавизейилан нилъедаго малал ралев вугев чи ватани, долги гIабдалзаби гуро, жидеего чед гьабуларес, чидае гурга гьабулареблъи лъаларел. Дуца дурго республикаялъул, дурго миллаталъул, дурго росу-ракьалъул, дурго эбел-инсул гьабулареб адаб-хъатирги, тIалаб-агъазги, цойгидазулищ гьабулеб? Гьабулаха мун кьун гIарацгун вичун восун вугебгIан заманаялъ. 

КигIан ургъаниги бичIчIизе кIоларо, щай дагъистаниязе Дагъистан бокьуларебали... Щай нилъеца нилъедаго данде рагъ балебали… Щай нилъ нилъерго бищунго кIудиял тушбаби ругелали... Щай гьединазухъ бугеб кинабниги кверщелалиги…

ГIурус мацIалдалдаса гIурусалде буссинабизецин лъаларел чагIаз, магIарул мацIаладаса таржама гьабуни хIалтIиго хвелилан, гьал Путинил рагIаби гIурусалъ кьолел руго: «Вопросы сохранения и развития русского и всех языков народов страны имеют важнейшее значение для гармонизации межнациональных отношений, обеспечения гражданского единства, укрепления государственного суверенитета и целостности России».  РагIулеб бугищ?  Гьадин абуна Путиница Йошкар-Олаялда букIараб данделъиялда. ГIурус мацIалъулго гIадин киналго мацIазулги бугила пачалихъалъе кIвар.

Жиб-жиб халкъалъул ва миллаталъул  ихтияр буго жиндирго мацI лъазабизе. Гьеб бугилан нилъер Республикаялъул Аслияб Законалдаги (Конституция) хъван буго.  Гьанже магIарулалъ хъвараб жо бичIчIулел чагIиги дагьал ругелъул нилъер, рахьдал мацIал пачалихъиял мацIал ругилан абураб жоги кIудиял хъулхъазда ругел хIакимзабаздацин лъаларелъул, гIурусалъ, доб Аслияб Законалъул 11 статьяялда хъван бугедухъ кьолеб буго: «Государственными языками Республики Дагестан являются русский язык и языки народов Дагестана. В Республике Дагестан гарантируется всем народам, проживающим на ее территории, право на сохранение родного языка, создание условий для его изучения и развития».

Щайха нилъер дагъистаниязда гьеб жо бичIчIулареб? БичIчIуларого гуро. БичIчIизе бокьуларого.

ГIурус мацI лъазаби дагь гьабизе бегьуларилан абурал Путинил рагIабиги  кьочIое росун, нилъер лъайкьеялъул министерствоялъ киналниги шагьаразул ва районазул лъайкьеялъул отделазде ритIун руго гьадин хъварал кагътал: «подготовить материал о проведенных родительских собраниях и поданных заявлениях родителей (законных представителей) при выборе для изучения родного языка с указанием выбранного языка в соответствии с частью 3 статьи 44 Федерального закона №273-ФЗ «Об образовании в Российской Федерации». 

Дица тIоцебего абичIищха, ал нилъер хIакимзаби таржамаялъе лъикIал гьечIилан, аз методистазда лъазабун буго, жив-жив цIалдохъасул эбел-эменги ахIун, «рахьдал мацIалъул дарсида гIодов чIезе бегьула дир вас (яс)», - илан хъвараб гIарза тIалаб гьабун гурони, рахьдал мацIазул дарсазде лъимал риччагеян. Гьале гъоб тIагъур босизе витIарас бетIер бачIиналъул мисал.

Гьаб 8884 номералда гъоркь министерствоялъул сайталда бугеб кагътида, гIемер гIадамазда бичIчIуларедухъ хъварал, амма лъачIого гIоларел жалги руго. ХIалбихье цо нужецаго цIализе.

БитIараб буго, миллиял гьоркьолъабазул ва гIурус мацIалъул советазул данделъиялда Путиница абуна гIурус мацIалде кIвар кьезе кколила, вуз лъугIарав чияс гIурус мацIалъул экзамен кьезе кколила, хIатта хIакимлъун чи восизе бегьуларила тIадегIанаб даражаялда гIурус мацI лъачIогойилан. Гьеб бугоха Россиялъулго масштабалда абурал рагIаби. Гьелдаго цадахъ, "В целом, наравне с русским  надо повышать уровень знания родного языка. Только так можно его сохранить и развивать на достойной основе", - йила, жидерго миллиял мацIал цIунизеги, лъазаризеги, школазда малъизеги кколилан абуна Путиница.

Ал нилъер чехьчурадал кире гIедегIун рукIунелали, «русский» - илан хъвараб бакI цIалун батула, «родной» - илан хъвараб бакI гьоркьоб биччан батула. Путиница Россиялъе гIурус мацI цIунулеб гIадин, республикаялъе рахьдал мацIал цIунизе тIадаб гьечIищ нилъер БетIерасда, лъайкьеялъул министерствоялда, шагьаразул ва районазул бутIрузда, жалго кIудиялилан кколел гIисинал хIакимзабазда?

Щиб бицаниги, Аллагьас кьураб бечелъи цIунизе рес букIарал, амма гьелда мал бараз, Аллагьасда цебе гьелъул жаваб кьезе букIиналъ, рекIее цодагьаб рахIат буго.


Автор: Баху МухIидинова

Баяналъул кьучI: Казият "Миллат". МахIачхъала

оценка новости: 
  • Не нравится
  • 0
  • Нравится
Оставить комментарий


ЦIех-рех
Нилъер заманалда магIарул халкъалъул аслияб масъалалъун щиб нужеца рикIкIунеб?
Ниж жамгIиял гьиназда
  •   VK 
  •  Facebook 
  •  Twitter 
  • OK

Мы в Twitter.Com


Мы в Ok.Ru

Курс валют предоставлен сайтом kursvalut.com