«Алла Пугачева» –ян абураб пьеса хъван бук1ана дица. Гьеб лъуна нилъерго авартеатралъ. Гьеб спектаклалда бицунеб бук1ана Алла Пугачева – ян абулей г1адан, квер ккун вачун цойгиги Галкин – илан абулев чигун, Дагъистаналде концерт кьезе яч1иналъул. Гьеб бук1ана комедия, сатира… Божа, дида киданиги рак1алде ккун бук1инч1о Авартеатралда гьединаб сепктакль бихьизабунилан Алла Пугачевалъеги гьев Галкиниеги лъимал гьарилилан. Бокьун гьеч1о дун сабаблъун Пугачевалъеги Галкиниеги лъимал гьарунилан къват1ибе раг1изе. Гьабилеб дарман лъаларо…
Талих1 ккараб жо буго гьезул лъамалазда – ясалда Лиза васасда Гарри – илан ц1арал лъун рук1ин. Дагъистан сабаблъун рижарал лъимал ругиланги абун васасда Хьвархьвач ва ясалда Хъистаманилан лъун бук1арабани щиб гьабилеб бук1араб? Хъандулай Галкина. Галкин Хьвархьвач Максимович. Гьединан нилъер ц1арал лъейгицин х1ехьелаан, бигьаяб жо – рачун дихъе рач1анани к1иябго лъимер, мун сабаблъун рижарал жал ругин гьанже т1алаб гьебейин азулилан? Ч1арт1илъги жемун к1иго билбаг1араб жо цебе лъуни, Хъистаманги Хьвархьвачги? Киг1ан къвак1арав чиясулги хвах биччула гьединаб бак1алде ккани.
К1иябго лъимер бегьилаан раччун авартеатралде щвезаризе, нужедаги бугин г1айиб гьал рижиялъе, кинабго дит1е рехугейин, «точно» артистал рахъунел г1адал жалги ругилан – лъихъе кьелел гьел? Х1айбула Г1абдулгъапуровас гьел хьихьуларо, бусурбаби гурилан, Шамилил заманалда бук1араб гъазаватлги жоги рак1алде щун лъугьуна. Гьит1инаб къоялдаса нахъего хьихьун, г1езарун авартеатралъеги артистал щибизе рук1инел? Нагагьлъун циндаго президент вач1ани авартеатралде, Галкиназул ц1ун эбги батани, сурила гури?
Лъимазда цадахъ бач1унеб раг1ула материнский капиталин абураб жо. Г1арац бач1унеб буго, амма кодобе щолеб раг1уларо гьеб. Гьеб кьолеб раг1ула лъимал к1удиял г1ураб мехалда гьел ц1ализаризе, гьезие рукъзал росизе. Хьвархьвачги Хъистаманги к1удиял г1езег1ан анир щал рук1инехъин ругел? Гьел к1удиял г1езег1ан памперсал росизе кколарелищ? Маго майилан щай кьолереб лъималазул бет1ергьабахъе «и так и так» кьезе кколеб жо? Гьебги толеб гьеч1о. «Материнский» капитал лъималазул бет1ергьабахъе кьунилан, пенсиия кьолеб бак1, т1убараб армиялъ сверун ккун бук1ун буго. Ч1артилъги жемун цебе лъун бугеб к1иябго билбаг1араб лъимада, нужее г1арац кьолеб бак1 сверун ккун бугин, кколеб толеб жо бич1ч1улеб х1ал гьеч1илан дица кин бич1ч1изабилеб? Гьезул к1алдиб «постояно» ч1ван тезе керенги гьеч1еб…
Садикалде кьезе кколел ал Галкинал. Цебецин г1арац кьезе бегьулаан заведующиялъе, рищват кьезе бегьулаан, майин гьаб лъимер бачейин нужехъего–ян. Гьанже Рамазан президентлъун вач1араб мехалда ришват босизеги х1инкъулел руго, лъималги къот1нор хут1улел руго. Цебе садикалъул заведуюшиялъ абулаан, дицаги т1ад ругезе кьезе кколин рищват, элъ босулеб жо бугин духъагиян, гьанже гьединан абизеги к1оларого расги лъик1аб х1ал гьеч1о элъулги. Мах1ачхъалаялдаго киналниги организацияби ч1ун руго Амиров т1ад вуссун вач1инег1ан, рищиял гьарун т1амурав мэрги гьеч1о, рищиял гьарич1ого мэрлъи гьабизе къуватги г1олеб гьеч1о. Жиндаса вац1адав чи гьеч1ин, рищиял т1орит1ани жив президентлъун вищулаанин Дагъистаналда – ян ч1ун Амировги вуго, туснахъалъув вугониги. Дица гьебгощинаб жо Хьвархьвачидаги Хъистаманидаги кин бич1ч1изабилеб?
Цадахъ рачине бегьилаан лъимал х1алт1уде, телевидениялде. Телевидениялдаги ц1ияв чи т1амун вуго директорлъун, гьабсаг1аталда телевидениялда щиб кин бук1унебали лъазабулев вуго, Галкиназе тарбия кьезе рег1ун гьеч1о. Москваялдасанги телевизоралъ Галкинал рихьизарулел ругони, Дагъистанлдаги гьелго Галкинал раккарулел ругони телевизоралдасан, цого жоялъухъ ралагьун кидаллъалг1ан рук1инел? Дагъистангойищ дунялалда бихьизабилареб?
Нилъер президент вук1уна зама–заманалдасан «Дагестан кормили, но не лечили» – ян. Гьабсаг1ат бищунго х1ажат буго гьел Хъистаманги Хьвархьвачги «кормит» гьаризе. Лечения байбихьила Бичас биччани, Хьвархьвачие сунат гьабураб мехалда. Цо–цо чаг1и рахъуна президентас г1емер бицунеб бугила гьадаб цо «кормили лечили» – ян абураб раг1и. Президентас г1емер бицунеб гьеч1о гьеб, сверухъе ругел журналистаз, телевидениялъ, газетаз, журналаз, радиоялъ г1емер къват1ибе кьолеб буго. Прнезидентас щибилан абуниги къват1ибе кьолеб буго. Цо нухалъ кьун толеб гьеч1о, нусго нухалъ кьолеб буго. Гьелъие к1иго г1иллаги буго, т1оцебесеб ккола чорхолъ бессун бугеб х1елх1елчилъи. Жураналистазе нухмалъи гьабулел чиновникал руго, президентасе живго г1емер гаргадилев вихьизавиги, рецц–бакъги жидеего г1адин бокьулин рак1алдеги ккун, гьесие ц1ар гьабулел ругел чаг1и. Жидерго х1елх1елчилъи г1акса кколеб бук1ин бихьуларого руго. К1иабилеб г1илла ккола, президентас гьабураб к1алъаялда гъорлъа бищун жидедаго бич1ч1араб жо къват1ибе кьезе бокьи. Бич1ч1ич1еб жо кинха гьезги къват1ибе кьелеб, эбги нусго нухалъ. Ц1акъ бокьулеб буго президентас абу–абураб къват1ибе кьезе, гьесда жалго рихьизе, гьес жалго «кормит» гьариялде хьул лъун.
Гьезие нусгог1ан къвариг1ун буго жакъа дир Хъистаманиеги Хьвархьвачиеги жалго «кормит» гьаризе. Ч1артилъги регун, билбаг1арги гьарун, дихъги ралагьун ч1ч1ич1ч1идилел кидаллъаг1ан ал рук1инел? Хъистаманида буго к1иго килоги хадубги, Хьвархьвачида лъабго кило – г1емераб заманаялъ баг1арго рук1унел г1адал жал гьеч1о, дагь–дагьккун хъах1иллъула ал…
Дагьал к1удиял г1ураб мехалда дица азда щиб гьабулеб? Г1араб мац1ги лъазабун жалги рохьое инилан ч1ани? Я вац, дур дурго Ват1анги бугин, дурго умумузул г1адаталги ругин, гьелде т1аде дуе лъай кьезе школалги институталги ругин, дагъистаниял жидерго ях1алъул, жидерго адаб–хъатиралъул, жидерго рет1ел–куналъул, жидерго г1акълогун, жидерго куч1дулгун, жидерго кьурдабигун, жидерго гьунаралъул, киданиги лъиданиги цере сурич1ел чаг1и ругилан Галкиназда дица кин бич1ч1изабилеб? К1удиял г1ураб мехалда Галкиназ малъизе лъугьани, маг1арухъа рач1арал г1олохъабазда, рак1алде ккараб бак1алда кьурдизе кколин, г1арабалъ хъвараб гурони т1ехь ц1алугейин, г1аракъи бичулеб тукен бихьани кьвагьизе кколин, гьадабцояб мажгиталдаса гьабцояб лъик1аб бугин, милиционер щибизе ч1аго тезе кколев чийн, дагъистаналда кьвагьа–г1анхъи лъуг1ани нилъ сурулин, москваялдасан телевизор сундул бицинебали лъаларого хут1улилан. Гьабсаг1ат цере регун ч1ч1ич1ч1идилел ругел Галкиназухъ балагьараб мехалда бокьараб гьабулел г1адал чаг1и лъугьинехъин руго азул.
«Алла Пугачева» – ян абураб пьеса хъваялдаса рак1 бух1ана дир. Щибизе дие ал, Пугачевалъулги Максимилги лъимал. Дирго дагьалищ ал рук1арал!
Нилъ киналго Галкиназде сверизарула аз. Игзаз.
Хъистаманицаги Хьвархьвачицаги.
Автор: Гъазимух1амад Гъалбац1ов
Баяналъул кьучI: Казият "Миллат". МахIачхъала
