Гьанжего гьанже гIунтIана дун гьаб гIелмуялда хадуй… Дун гIадин, нужги кватIичIого рукIине, бицун телин.
ГIакъилав бихьинчиясе, цIодорай гурони, чIужугIаданги данде кколей гьечIо. ЦIодорай чIужугIаданги гIабдаласе инищха… Амма, чIужугIадан йикIине кколей йиго гIассиго цIодорай. Гьеб цIодорлъиги кидаго бахчун букIине кколеб буго бихьинчиясул гIакъиллъиялда нахъа. Гьедин гьечIони, жо кколеб гьечIо.
ГIакъиллъиялда нахъа цIодорлъи бугебгIан заманаялъ, талихIги букIунеб буго гьезда цадахъ, кибего кьуричIого.
Гьадаб алъул цIодорлъи ассул гIакъиллъиялда цебе кIанцIани… хвана кинабго...
Кинабго гуро. Алъул цIодорлъиялъул иш лъугIулеб буго гьадаб бакIалдаго… ассул гIакъиллъиялда цадахъ. Хъван батугегийин.
Гьединлъидал, гIакъиллъиги букIине кколеб бугоха цIодорлъи нахъа бахчун бажарулеб гIадаб… кIудияб ва къуватаб. Нагагь гIакъиллъи гьитIинлъун тIеренлъун лъугIани, бокьаниги бокьичIониги цIодорлъи цебе кIанцIичIого хутIулеб гьечIо. ГIакъиллъиялъ, нахъаса къотIичIого, жиндирго черх лълъадаризе кколеб буго, къуват загIиплъичIого букIине. Доб цIодорлъи цIодораб жо букIунелъул, долдаса бахчун бажарилищха гIакъиллъи загIиплъи…
ЦIодорлъиги цIодораб гIамалалда букIине кколеб буго, гIакъиллъиялда алдасаги цIодораб цIодорлъи бихьичIого букIине.
Гьеле гьедин, гIакъиллъи цебе тун, цIодорлъи нахъа чIун гьабуни гIумро, кинабго жо битIа-бишун кколеб буго.
Малъизе дун йикIинги, нужерго талихIха)))
Автор: Баху Мух1идинова
Баяналъул кьучI: Казият "Миллат". МахIачхъала
