ЛъагIалил хIасилал
Бакълъулалги 2016 сонги
2016 соналда Гумбет районалда ккарал кIвар бугел лъугьа-бахъинал
2016 соналъул лъабабилеб февралалда Дагъистаналъул бетIер Рамазан ГIабдулатIипов дандчIвана Гумбет районалъул нухмалъулев МухIамадгIали МухIамадгIалиевгун. Республикаялъул бетIерас Гумбет районалъул цебетIеялъе лъикIаб къимат кьуна.
* * *
Ункъабилеб февралалда районалда тIобитIана Северияб Кавказалъул имам, шайих Шамил ракIалдещвеялъул мажлис. Гьениб гIахьаллъи гьабуна Дагъистаналъул бусурбабазул Духовнияб управлениялъул вакилзабазги.
* * *
ИчIабилеб февралалда Гумбеталде хIалтIулаб сапаралъ вачIана Дагъистаналъул бетIерасул вакил ГIалибег ГIалиев. Бакълъулазул нухмалъулезулгун дандчIвай гьабун хадуб, тIобитIана росабазул жамгIиятал гIахьаллъараб данделъи. ТIаде къабул гьаруна гIадамал.
* * *
ЦIадаса ХIамзатил цIаралда бугеб Аваразул драмаялъулаб театралда тIобитIараб рахьдал мацIалъул Халкъазда гьоркьосеб къоялъул хIурматалда, ДРялъул аваразул регионалияб миллиябгун маданияб автономиялъ гIуцIана байрамалъулал тадбирал. Гьениб гIахьаллъи гьабуна Гумбет районалъул вакилзабазги.
* * *
Гумбет районалда гьоркьоб лъуна Халкъияб Собраниялде Дагъистаналъул бетIерасул ХитIаб. Гьеб гьоркьоб лъеялда гIахьаллъана ДРялъул Халкъияб Собраниялъул председателасул заместитель СайгидахIмад АхIмадов.
* * *
Бакълъулазул вакилзабиги гIахьаллъун, МахIачхъалаялда тIобитIана Аваразул литератураялъе кьучI лъурав классик, философ, гIалимчи Инхоса ГIали-хIажи гьавуралдаса 170 сон тIубаялъул хIурматалда гIелмияб сессия.
* * *
Бакълъулазул руччабаз гIахьаллъи гьабуна МахIачхъалаялда тIобитIараб регионазда гьоркьосеб форумалда.
* * *
Шамил районалъул «Цолъи» басмаялъул 85 сон тIубай кIодо гьабулеб данделъиялда гIахьаллъана «Гумбет» информациялъул гIуцIиялъул хIалтIухъаби.
* * *
Аргъваниса ГIайшат ХIайбулаевалъ цIунана психологиялъул гIелмабазул кандидатлъиялъул диссертация.
* * *
Гумбеталда тIобитIана Аваразул газетазул ассоциациялъул пресс-тур.
* * *
ЦIунди ва Щабдухъ СПКязул хIалтIухъабаз гIумру гьабулеб Бабаюрталъул зонаялда бугеб Первомайское росулъ рагьана лъималазул ах ва футболалъул байдан.
* * *
ЛъаратIа ва Ингишо росабалъ рагьана футбол хIалел байдаби.
* * *
Дагъистаналъул фотожурналистикаялъул машгьурал махщалилал МухIамад ХIажидадаев, Мурад ХIамидов ва Шамил ХIажидадаевги гIахьаллъун Гумбет районалда тIобитIана фототур.
* * *
Дагъистаналъул базарганлъиялъул ва инвенстициязул агентствоялъул нухмалъулесул заместитель ХIамид МухIамадов ва гьеб идараялъул цогидалги вакилзаби рачIана Гумбеталде.
* * *
ЛъаратIа росулъ рагьана гьалбадерил рукъ. Гьеб рохалилаб тадбиралда гIахьаллъана ДРялъул Халкъияб Собраниялъул председателасул заместитель СайгидахIмад АхIмадов.
* * *
Бакълъулазул жигараб гIахьаллъигун ана Пачалихъияб Думаялде, ДРялъул Халкъияб Собраниялде рищиял.
* * *
СайгидахIмад АхIмадов вищана Дагъистаналъул Халкъияб Собраниялъул нухмалъулесул тIоцевесев заместительлъун.
* * *
Россиялъул пенсиялъул фондалъул Гумбет районалда бугеб отделениялъул нухмалъулев ТIалхIат Жамалудиновасе щвана «Россиялъул Федерациялъул пенсиялъул фондалъул хIурматияв хIалтIухъан» абураб цIар.
* * *
Жанисел ишазул министерствоялъ рагъулаб, хъулухъалъулаб ва физическияб хIадурлъиялъул халгьабизе щибаб соналъ полициялъул хIалтIухъабазда гьоркьор къецал тIоритIула. Араб соналъ гьел къецазда Россиялъул МВДялъул Гумбеталда бугеб отделалъул уголовнияб розыскалъул оперуполномоченный ХIажимурад Зулумхановас тIоцебесеб бакI ккуна.
* * *
Республикаялъул рахунел унтабазул больницаялъул бетIерав тохтур, ТIад Инхо росулъа МуртазагIали МухIамадовасе кьуна «Дагъистаналъул халкъияв тохтур» абураб цIар.
* * *
Районалде вачIун вукIана ДРялъул гражданскияб оборонаялъул, гIадатияб гуреб ахIвал-хIалалъул ва тIабигIиял балагьал лъугIизариялъул ишазул рахъалъ министр Нариман ГъазимухIамадов ва гьес гIадамал тIаде къабул гьаруна.
* * *
Районалда тIобитIана Дагъистаналъул муфти, шайих АхIмад-хIажи ГIабдулаевасул «ЛъикIал тIабигIатазул ах» абураб тIехьалда тIасан конкурс.
* * *
Казаналда тIобитIараб ТIолгороссиялъул конкурсалда гIараб мацI лъаялъе лъабабилеб бакI ккуна Аргъваниса МухIамад ТIагьировас.
* * *
Игьалир тIоритIана магIарул адабияталъул классик Инхоса ГIали-хIажиясул асарал лъаялъул рахъалъ къецал.
* * *
Халкъияб творчествоялъул, фольклоралъул ирсалъул ва этнографиялъул хIакъалъулъ фидеофильмазул 24 аб. Регионалияб конкурсалъул хIасилал гьарун, ДРялъул культураялъул министерствоялъул диплом щвана Россиялъул халкъазул гIадатияб маданияталъул Гумбеталъул централъул нухмалъулев Набигула АхIмадибировасе.
* * *
Дербенталда тIобитIараб «Бищун лъикIав классалъул нухмалъулев» республикаялъулаб конкурсалда лъабабилеб бакI ккуна Игьалиса мугIалим ГIайшат СагIидовалъ.
* * *
Ингишоб тIобитIана 5-8 классазул цIалдохъабазда гьоркьоб ХанмухIамад Ахкубеговасул цIаралда хIисаб гIелмуялъул республикаялъулаб олимпиада.
* * *
«Тарихалъул матIу: Дербенталъ – 2000 сон» республикаялъулаб конкурсалда лъабабилеб бакI ккуна «Дербент» абураб кечI хъварай Ингишо гьоркьохъеб школалъул цIалдохъан Мавлидат Загьировалъ.
* * *
Районалда тIоритIана «ЛъагIалил бищун лъикIав классалъул нухмалъулев», «Авар мацIалъул лъикIав учитель – 2016» конкурсал.
* * *
Каспийскалда 16 январалда тIобитIараб тайский боксалъул рахъалъ республикаялъулал къецазда Дагъистаналъул чемпионлъун вахъана Аргъваниса МухIамад ХIажиев.
* * *
Хасавюрталда 17 январалда ХIамид ХIамидовасул цIаралда бугеб спортивияб комплексалда тIоритIарал эркенаб гугариялъул къецазда 74 кг. цIайиялда тIоцебесеб бакI ккуна Аргъваниса Темирлан Свелимановас.
* * *
Красноармейск поселокалда «Спарта» спорталъул клубалда тIобитIана «Шестой континент» дармил рукъалъул призалъе гIоло Гумбеталдаса 39 командаялда гьоркьоб кIиабилеб турнир.
* * *
Москваялда тIобитIараб Россиялъул чемпионаталда киокусинкай – каратэялъе тIоцебесеб бакI ккуна ЧIикь росулъа ГIумар МухIамадовас (МелъелтIа ДЮСШ).
* * *
Районалда тIобитIана олимпийцал ХIажимурад МухIамадовасул ва Мурад ХIайдаровасул цIаралда эркенаб гугариялъул рахъалъ Халкъазда гьоркьосеб кIиабилеб турнир.
* * *
Азербайджаналда гугариялъе 63 кг. цIайиялда тIоцебесеб бакI ккуна Аргъваниса ХIажимурад ХIажиевас.
* * *
Швециялъул Йенчепинг шагьаралда тIоритIарал тайский боксалъул къецазда дунялалъул чемпионлъун 86 кг. цIайиялда вахъана Аргъваниса МухIамад ХIажиев.
* * *
ЦIунди-Щабдухъа Рамазан Набигулаев вахъана ММАялъул рахъалъ дунялалъул кубокалъул кIицIулго чемпионлъун.
* * *
Ингишо росулъ тIобитIана тренер ва насихIатчи Жаватхан Жаватханов ракIалдещвеялъул эркенаб гугариялъул республикаялъулаб турнир.
* * *
МелъелтIаса ГIиса Бегаев бокс хIаялъул рахъалъ Крымалда тIоритIарал къецазда чемпионлъун вахъана 75 кг. цIайиялда.
* * *
Щабдухъ росулъа МухIамад Мурадовас СБИ ММАялъул рахъалъ Дагъистаналъул чемпионаталда тIоцебесеб бакI ккуна.
* * *
Греказулгун римазул гугариялъул ТIолгороссиялъул турниралда мазгарул медалалъе мустахIикълъана Игьалиса МухIамад МуртазагIалиев.
* * *
МелъелтIаса Юсуп СагIадулаевас араб соналдаги чIел босана квержубараб рагъуе (смешанное единоборство) Янгон шагьаралда тIоритIарал къецазда.
* * *
Москваялда тIоритIарал къецазда бергьенлъи щвана квержубараб рагъуе ЦIиликьа Аюб Гьиматовасе.
* * *
Аргъваниса Къурбан ХIажиев грэпплингалъул рахъалъ дунялалъул чемпионлъун вахъана.
* * *
Польшаялда ветераназда гьоркьор тIоритIарал эркенаб гугариялъул къецазда кIиабилеб бакI ккуна Аргъваниса Ибрагьим Ибрагьимовас (76 кг. цIайиялда)
* * *
Грэплингалъул рахъалъ Россиялъул кубок щвана МелъелтIаса Мурадбег МухIамадовасе.
ХIадурана
Къурмагъиз ХIадисовалъ
Автор: Къурмагъиз ХIадисова
Баяналъул кьучI: Казият "Гумбет". Бакълъул мухъ
